Хонгор нутгийн залуусын дунд шинэлэг санаа бүхий гарааны бизнес буюу старт-ап шалгаруулах уралдааныг зарлалаа. Тодруулбал, аймгийн Хөдөлмөр халамжийн үйлчилгээний газраас зохион байгуулалтыг хариуцаж  шинэ технологи, инновац шингээсэн гарааны бизнес эрхлэгч залууст гарааны санхүүжилт олгох, мэргэжлийн менторууд, бизнес эрхлэгчдээс зөвлөгөө авч бизнесээ илүү боловсронгуй болгох боломжийг бүрдүүлэх, бизнес санааг нь сурталчлан таниулах, дэмжих зорилгоор тус уралдааныг зарлаж байна.

Уралдаанд  шинэлэг санаа бүхий старт-ап бизнесээ эхлүүлж буй Баянхонгор аймгийн 15-34 насны залуус, МСҮТ-ийн суралцагч, гарааны бизнес эрхлэгчид, нийгмийн даатгал төлдөггүй иргэн(сайн дураараа төлдөг байж болно), хөдөлмөр эрхлэлтийг дэмжих сангаас ямар нэгэн санхүүжилт авч байгаагүй старт-апууд хамрагдах боломжтой юм. Шилдэг старт-ап шалгаруулах тус уралдааныг ХНХЯ, ХХҮЕГ, “Старт ап Монгол” ТББ-тай хамтран хэрэгжүүлж байгаа бөгөөд уралдаанд бүртгүүлсэн залуусын дунд сургалт зохион байгуулж, хурдасгуур хөтөлбөрт хамруулахаар төлөвлөжээ.

Оролцох хүсэлтэй залууст тавигдах шаардлагын тухайд шийдэх гэж байгаа асуудлын талаар сайн ойлголт мэдлэгтэй байх, шинэ, уламжлалт бус, өвөрмөц санаа гаргасан байх, хэрэв багаар оролцох бол багийн гишүүдийн тоо 3 ба түүнээс дээш, гишүүдийн итгэл, үнэмшил, мэдлэг чадвар, хүсэл эрмэлзэл нэгдсэн байх хэрэгтэй хэдий ч заавал төсөл бичих шаардлагагүй, ганцаараа оролцох бүрэн боломжтой,  ямар нэгэн компани, аж ахуйн нэгжтэй байх  шаардлагагүй гэжээ.

Уралдаанд оролцох хүсэлтэй залуусыг наймдугаар сарын 25-наас есдүгээр сарын 7-ны өдөр хүртэл бүртгэж, шалгаруулалтыг 8-наас 10-ны өдөр хийж дүнгээ гаргах аж.Шалгарсан нэг багт 10 сая  төгрөгийн санхүүжилт олгох юм. Уралдаанд https://bit.ly/3RcY9WS холбоосоор бүртгүүлэх боломжтой. Дэлгэрэнгүй мэдээллийг8990-9924 8677-8607 гэсэн дугаараасажлын цагаар лавлаарай.